ALTINGA PIÇRAK YABIŞMIY

Soñgı waqıtta “Mäydan” jurnalı redaqtsiyaseneñ gonorarnı döres bülmägänen säbäp itep, şähär proquraturası tarafınnan kürenekle yazuçı, cämägat eşleklese, Çallı yazuçılar berlege räise Vaxit İmamovnı ezärlekläü qampaniyase bara.

Ämma, Çallı cämägatçelege eşçänlen azmı-küpme küzätep bargan keşegä kürengänçä, tatar milli aqtivistların ezärlekläü, alarnı ictimagıy tormıştan çitläşterü maqsatında küñellären, däräcälären töşerü nindider mäkerle daimilekkä, ezleklelekkä äverelep bara.

Küptän tügel şähärebezdä monumental formadagı prawoslawie täreläreneñ ciñü parqın bozıp toruına qarşı çıqqan ber törkem äbilär – xezmät veterannarı östenä älege şähär proquraturası üzeneñ böten egärlege belän yabışqan ide. Bügen inde ul, zurdan kubıp, tanılgan tatar yazuçısı isemenä tap töşerä, anıñ icatqa, ezlänülärgä bulgan ixtıyar köçen kimetergä tırışa.

Xoquq saqlau sagında torırga tieşle Çallı proquraturasınıñ tatar cämägat eşleklelären, tanılgan yazuçılarnı teläsä nindi säbäplär tabıp ezärlekläve "kiräge çıqsa, bez inde ütkän gasırnıñ utızınçı ellarındagıça repressiyalärgä äzer" digän raport kebek kürenä. Ämma, tege ellarda “burjuaz millätçelär” ezärleklänsä, bügen gap-gadi tatar “millätçeläre” töşençäse dä citä bugay.

Şunıñ östenä, qayber tatar yazuçıları, jurnalistları, ictimagıy oeşmalar tiräsendä ışqınıp, tormışqa aşmagan ambitsiyalären qanägatländerergä teläp yörüçe zatlar, algaraq çıqqan, eşraq uqıla, işetelä, kürenä başlagan işläre östennän Räsäyneñ keşe xoquqların qısıp toruçı organnarına şiqayatlär (donoslar) yazıp, älege växşileklärneñ säbäpçese bulıp toralar.

Gasırlar bue izelep, däüläte bulmagan şartlarda yaşägän tatarnıñ garip bulıp formalaşqan psixologiyase üz işlären talauga caylaştırılgan küräsen. Xalqıbıznıñ tarixın öyränep, anıñ milli geroyların barlap tarixi romannar yazgan keşegä ixtiram kürsätü, anı zurlau, kiräk çaqta yaqlau urınına – könçelek, mäker, donos.

Äye, Vaxit qaywaqıt kirägennän artıq turıdan äytkäli, dilär. Nişlämäk kiräk – härkemneñ üz sıyfatları. Turı äytteräseñ kilmäsä, bik yaqınaymasqa gına kiräk.

Bez yazuçılarga äsärläre öçen räxmät äytäbez. Ukuçı xalıq icat keşelären alarnıñ şäxsi tormış ürnäkläre yaisä süz uñaennan kemgä närsä äytkäne öçen tügel, ä yazgannarı öçen bäya birä. Xaqimnärgä häm baylarga xaqıyqatne açıp kürsätü wazifasınıñ da yazuçılar cilkäsendä buluın iskä alsaq, xaq süzläre öçen dä bez alarga räxmät äytergä tieşter.